अमेरिकादर्पण सन् २००० मा अमेरिकाको न्यूयोर्क राज्यमा कानुनअनुसार दर्ता भई प्रिन्टमिडियाको रुपमा प्रकाशनको शुरुवात भएको हो । संसारका विभिन्न भागमा बसोबास गर्ने नेपालीबीच सुमधुर सम्बन्ध कायम गर्ने, उनीहरुबीचको एकतालाई अझ मजबुत बनाउने र विभिन्न देशमा हुने घटनालाई नेपाल र संसारभर छरिएर रहेका नेपालीबीच सम्प्रेषण गर्ने उद्देश्य साथ यसको प्रकाशन सुरुवात गरिएको थियो ।
प्रकाशनको अवधिमा देशविदेशका हजारौं प्रियपाठकका न्यानो माया हामीले पाएका थियौं । तर बितेका सातवर्ष विविध समस्याका कारण यसको प्रकाशनलाई निरन्तरता दिन सकिएन । प्रिन्टमिडियाको माध्यमबाट संसारभर छरिएर रहेका हाम्रा प्रियपाठकलाई अविच्छिन्न रुपमा सुसूचित गर्न नसकेकोमा हामी दुःखित छौं । एक ठाउँमा भएको घटना छापेर पत्रिका विभिन्न मुलुकमा पठाउँदा र हाम्रा पाठकको हातमा पर्दा त्यो घटना निकै पुरानो भैसकेको हुन्थ्यो । यसर्थ पनि छापामाध्यमबाट पाठकहरुलाई समयमै सुसूचित गर्न कठिनाई भएको हामीले महसुस गर्žयौं र अहिले यसलाई अनलाइनको रुप दिएका छौं ।

अमेरिकादर्पण प्रिन्टमिडियाको रुपमा रहँदा निरन्तर लागिरहनु हुने संस्थापक जनक राना, मानधोज मोक्तान, भीम कार्की, आइत सोल्टी गुरुङ, बद्री खनाल, सम्पादक अग्निशिखा, शार्दुल भट्टराई, विशेष सम्वाददाता इन्दिरा कार्की (अमेरिका), नर्वदा राना तथा यमन राना (नेपाल) विशेष धन्यवादका पात्र हुनुहुन्छ । प्रिन्टमिडियाको रुपमा प्रकाशन हुँदा विज्ञापन दिएर, समाचार पठाएर तथा अन्य प्रकारले सहयोग गर्ने सबैलाई हामी धन्यवाद दिन चाहन्छौं ।

अमेरिकादर्पणले अहिले नयाँ स्वरुपमा आफ्नो यात्रा आरम्भ गरेको छ । हामी हाम्रा पाठकवृन्दलाई अझ छिटोछरितो रुपमा राष्ट्रिय तथा अन्तर्राष्ट्रिय घटनाक्रम बारे सुसूचित गर्न सक्छौं भन्नेमा विश्वस्त छौं । हाम्रो अनलाइन पत्रिकामा आफ्नो व्यापार व्यवसायको विज्ञापन दिएर लाभान्वित हुन विज्ञापनदातालाई अनुरोध गर्दछौं । अहिले हामीले नेपालीमा शुरुवात गरेपनि निकट भविष्यमा अंग्रेजीमा पनि अनलाइन सुरु गर्ने विश्वास दिलाउन चाहन्छौं ।

हाल अमेरिकादर्पणको सञ्चालक समितिमा वोधराज त्रिपाठी (नेपाल) तथा भीम कार्की, जनक राना, सुशील क्षेत्री, जीवन जोशी, कृष्ण भण्डारी, चेतनाथ भट्टराई तथा गोकर्ण दाहाल र विशेषसम्वाददाता इन्दिरा खड्का (अमेरिका) रहेका छौं । हामी सबैको तर्फबाट निष्पक्ष, स्वतन्त्र र सही समाचार सम्प्रेषण गर्ने प्रण गर्दछौं । हाम्रो यो सपना, संकल्प, समर्पण र सहयात्रा तपाईहरुको साथविना पूरा हुँदैन । हामी तपाइँहरुको निरन्तर सदभावको अपेक्षा राख्दछौं । तपाइँ र हामी मिलेर सञ्चार सिर्जनाको संसारमा एउटा नयाँ आयाम थपौं ।