नायिका सञ्चिता लुइँटेल एकाएक सम्पर्कविहीन भई मुम्बई छिरेपछि बन्दी फिल्मका निर्देशक विजय केरुङ तनाबग्रस्त छन् । उनी तनाबमा आउनुको कारण सञ्चिताको सुटिङ बाँकी रहेर भने होइन । कारण हो, सञ्चिताको डबिङ कसरी गर्ने भन्ने ।

सञ्चिताले नायक निखिल उप्रेतीसँगको प्रेमलाई बिहेमा परिणत गरिन् भन्ने चर्चाले अहिले कलिउड तातेको छ । निखिल र सञ्चिताले दोस्रो बिहे गरे, अब उनीहरू केही समय नेपाल र्फकन्नन् भन्ने अड्कल र ठोकुवा फिल्मकर्मीमाझ चलिरहेको छ । निर्देशक विजय आफ्नो फिल्म बन्दी सञ्चिताको डबिङका कारण अड्काइरहन चाहँदैनन् । सञ्चिताको डबिङ गराउन अरू नै कलाकार खोज्दै छन्, विजय ।

सञ्चिताले बिहे गरेकाले अब फर्किन्नन् भन्ने सुनेपछि उनले उनको डबिङ अर्की नायिका निरुता सिंहलाई गराउने योजना बनाएका थिए । तर, सञ्चिता र निरुताको स्वर 'म्याच' नखाने भएकाले त्यो योजना खारेज गरेको बताउँछन्, उनी । भन्छन्, 'सञ्चिता केही महिना नेपाल नआउने उनको पारिवारिक स्रोतले बतायो । त्यसपछि मैले उनको डबिङ निरुताबाट गराउने सोचाइ बनाएँ । तर, निरुताको स्वर र सञ्चिताको स्वर दर्शकले प्रस्टै चिन्ने भएकाले उनको डबिङ कसलाई गराउने भन्ने टेन्सन भएको छ ।'

बन्दीमा सञ्चिता लुइँटेलबाहेक अरुणीमा लम्साल, दिलीप रायमाझी, सुमन सिंहलगायतका कलाकारको अभिनय रहेको छ । रमेश गुरुङ कर्मा निर्माता रहेको बन्दीका अन्य कलाकारको डबिङ सहजै हुने भए पनि सञ्चिताका कारण काम रोकिएको बताउँछन्, निर्देशक विजय । 'अब अरू कुर्दिनँ । आइतबारदेखि कोही नयाँ कलाकारबाट सञ्चिताको डबिङ गराउँछु,' निर्देशक विजय भन्छन् ।

उता, निखिलका कारण निर्माणाधीन फिल्म कसमको बाँकी सुटिङ पनि अन्योलामा परेको छ । कसमका निर्देशक लक्ष्मण रिजाल भन्छन्, 'निखिलबाहेकका अरू सिन खिचिसकियो । अब उनी नआएसम्म सुटिङ हुँदैन ।' निखिल कहिले आउँछन् ? उनलाई पनि थाहा रहेनछ । 'खै कहिले आउँछन्, थाहा छैन,' उनले भने, 'एग्रिमेन्ट गरेर पैसा फासाइसकियो । उनी कहिले आउँछन्, केही चाइँचुइँ नै छैन ।'