गणेश बस्नेत

तपाई आफुभन्दा कति उमेरको फरक व्यक्तिसंग विवाह गर्नुहुन्छ वा गरिसक्नु भएको छ ? सायद सरदर दुइदेखी दश वर्षो फरकमा होला, तर दोब्बर भन्दा माथिको उमेरको फरकमा सायदै बिवाह भएको होला । नेपाली समाजमा कहिलेकाही विवाहका नौला र आश्चर्य जनक घटनाहरु घट्ने गर्दछन् । यस्तै आश्चर्यजनक बिवाह भएको छ, आइतवार भक्तपुरको लोकन्थलीमा । एक वृद्ध व्यक्तिले आफुभन्दा आधा उमेर भन्दा कम उमेरकी एक युवतीसंग तेस्रो पटक प्रेम बिवाह गरेका छन् । उनीहरुको यस बिवाहले मानिस बुढो भएपनि मन बुढो हुँदैन र मायालाई उमेरले छेक्दैन भन्ने उखानलाई एक पटक फेरि ब्यवहारमा चरितार्थ गरिदिएको छ ।

उमेरले असी कटेका बृद्ध कर्ण बहादुर कार्की आइतवार परम्परागत रुपमा विवाह बन्धनमा बाधिएका छन् । युवा झैं देखिने जिउडाल भएका कार्कीले आफूभन्दा आधा कम उमेरकी युवती यशोदा खडकालाई आइतवार तेस्रो श्रीमतीका रुपमा भित्र्याएका हुन । कार्की र खडकाबीच छ महिना अघिदेखि प्रेमको बिजारोपन भएको थियो । सुन्दा पत्यार नलाग्न सक्छ, यो तस्विर त्यही जोडीको हो । तस्विरमा देखिएका दुलाह हुन, ८३ वर्षीय कर्ण बहादुर कार्की र दुलही हुन ४२ बर्षीया युवती यसोदा खडका ।

संखुवासभाको चैनपुर गाविस वडा नम्बर ५ फलाटे स्थायी घर भई भक्तपुरको लोकन्थलीमा बस्दै आएका कार्कीले आइतवार संखुवासभा कै छिमेकी गाँउ बानेश्वर गाविस निवासी यशोदा खडकासंग विवाह बन्धनमा बाधिएका हुन । प्रेमलाई अन्तिम रुप दिने निर्णय भएपछि कार्कीले ४२ वर्षीय अविवाहित खड्कालाई तेस्रो श्रीमतीको रुपमा आफ्नो घर भित्र्याएका हुन । कान्छी श्रीमतीको एक वर्षअघि निधन भएपछि कार्की बुढेसकालको साहारा भन्दै आइतवार पुन तेस्रो पटक विवाह बन्धनमा बाधिएका हुन ।

चार छोरा, पाँच छोरी र २५ नाति, नातिना र पनाति पनातीना रहेका कार्कीले यो विवाह न त लुकाएर गरे, न त भागेर नै । उनले सिंगै समाजको अगाडी सानदारसंग आफ्नो तेस्रो विवाह गरेका हुन् । बाह्र छोरा तेह्र नाती बुढाको धोक्रो काधै माथि भन्ने उखान आफुमाथि नलागोस् भनेर तेस्रो पटक ८३ को उमेरमा विहाव गरेका हुन्, कार्कीले । उनी दुलही लिन जन्ती जानुको साटो दुलहीका परिवारलाई नै आफ्नै घरमा बोलाएर विवाह बन्धनमा बाधिएका हुन् । माया प्रेमलाई उमेरले छेक्दैन भन्ने लोकोक्ती सुन्नेहरुका लागि कर्ण- यशोदाको जोडी बलियो दृष्टान्त हो । ८३ वर्षीय बेहुला कर्ण ४२ बेहुली यशोदा दुवै खुशी छन् ।

दुइ छोरा छुट्टएपछि बुढेसकालको सहाराको रुपमा यसोदालाई भित्र्याएको बेहुला कार्की बताउँछन । आफूलाई खाना पकाएर खुवाउने र बुढेसकालको साथीको खाँचो परेकोले अर्को विवाह गर्नु परेको उहाको भनाई थियो ।

"बुढेसकालको साहाराको रुपमा यिनलाई भित्र्याएको हु," बिवाहबारे कार्कीले भने । आफु भन्दा दोब्बर उमेर भन्दा माथिका कार्कीलाई मन पराएकी दुलही यशोदाले पनि आफुलाई मन पराएको कारण घरमा माग्न आएपछि स्वीकृती दिएको बताइन । दुइ जनाबीच प्रेम बसेपछि कार्की उनलाई माग्न घर गएका थिए । यशोदाको परिवारले शुरुमा अस्वीकार गरेपनि कार्कीसंग बिवाह गर्ने अडान लिएपछि स्वीकृती दिएको थियो । यशोदाले बिवाहबाट आफुलाई अत्यन्त खुसी तुल्याएको प्रतिक्रिया दिइन । "उहाँहरु घरमा माग्न आउनु भयो मैले हुन्छ भने" याशोदाको भनाई थियो ।

बाबुको बिहे देखियो भन्ने नेपाली उखानका कारण हुनसक्छ, कार्कीको बिवाहमा छोराछोरी भने कोही सहभागी थिएनन् । यद्यपी बाजेले तेस्रो पटक बिवाह गरी नयाँ हजुरआमा भित्रयाएपछि नाती नातिनाहरुले भने खुशी व्यक्त गरे । उनीहरु सामाजिक रुपमा गलत नजरले हेर्ने हो कि भन्ने डरले क्यामरामा भने आउन रुचाएनन् । 

विवाह मण्डपमा सहभागी छिमेकी राजेन्द्र केसीले मन मिले विवाहको लागि उमेरले छेक्न सक्दो रहनेछ भन्ने प्रमाण बृद्ध र युवतीबीचको बिवाहले पुष्टि गरिदिएको बताए । बुढेसकालमा गरिएको विवाहले पालन पोषणमा राम्रो व्यवस्था हुने उनको भनाई थियो । विवाह व्यक्तिको निजी मामला हो ।

बुढेसकाल हेरचाहका दृष्टिले सबै भन्दा महत्वपुर्ण उमेर समुह हो । सहाराको खोजीमा जुरेको यो लगनले विवाहलाई उमेरको कसीमा राखेर हेर्नेहरुलाई गतिलो सवक सिकाएको छ । र विवाहलाई हेर्ने संकीर्णबादी सामाजिक दृष्टिकोणलाई पनि रुपान्तरणको पाटोमा लैजान उत्प्रेरित गरेको छ । वृद्ध कार्कीको हेरचाह गर्ने कसम खायर प्रणयसुत्रमा बाँधिएको कर्ण यशोदाबीचको लगनगाठोलाई हाम्रो पनि सलाम ।