गीता शर्मा

तपाईं पनि छोरीचेलीको विवाह गर्दै हुनुहुन्छ ? छोरी दिने घरमा के के सुविधा छन्, अनि सम्पत्ति कति छ भनेर हेर्नुहुन्छ होला । तर पर्वतको  भोकसिङ्गमा  छोरी दिनेले भने आलुको भकारी हेर्न थालेका छन् । जति धेरै आलु फलाउन सक्यो भोक्सङ्गवासीले उति नै गतिली बुहारी भित्रयाउने गरेका छन् ।

सदरमुकाम कुस्माबजारबाट दक्षिणपुर्वमा पर्ने भोकसिङ्गमा कृषकले आलुसँग धान साटेर वर्षभरि भात खाने भएकाले छोरी दिने आलुको भकारी हेर्न थालेका हुन् ।भोकसिङ्ग गाविसमा आलुमात्र उत्पादन हुने गर्दछ ।

जिल्लाको प्रमुख आलु उत्पादन पकेट क्षेत्रका रूपमा रहेको भोकसिङ्गका कृषकले वर्षमा १५ मुरीदेखि ३०० मुरीसम्म आलु फलाउने गर्दछन् । उत्पादन गरेको आलुसँग धानसँगै मकै, कोदो पनि साट्ने गर्दछन् । यतिबेला भोकसिङ्गमा आलु लिन आउनेको ताँती लागेको छ । छिमेकी बागलुङको जैदीबाट धान बोकेर आलु लिन आएका दीनानाथ शर्माले भने- हामीले रोजीरोजी धान दिन्छौँ, धान हेरेर रोजीरोजी अरूले छोरी दिन्छन् भोकसिङ्गवासीलाई ।

तीन दशक पहिलेसम्म व्यावसायिक रूपमा आलु उत्पादन नहुँदा मकै र कोदो प्रमुख बाली रहेको थियो । कोदो र मकैमात्र फल्ने भएकाले छोरी माग्न जाँदा विवाहका लागि धेरै अभिभावकले छोरी दिन नमान्ने गरेको अनुभव सुनाउँछन् कृषक रुद्रबहादुर क्षत्री ।

भोकसिङ्गमा २०३५ सालपछि व्यावसायिकरूपमा आलु उत्पादन भएपछि ती दिन पूरै फेरिएका छन् । बीउका लागि आलु साट्न आउनेहरूले ल्याएको धान पनि छानेर लिन थालेका छन् । गुडुराजस्ता मीठो भात हुने चामल रोजीरोजी लिने गरेका छन् । नराम्रो धान देखेमा आलु छैन भनेर फर्काउने गरेका छौँ- अर्का कृषक केशनाथ उपाध्यायले भने । भोकसिङ्गमा आलु उत्पादन भएपछि यहाँको बीउ अन्यत्र पठाउनका लागि राष्ट्रिय कृषि अनुसन्धान कोषको सहयोगमा स्थानीय संस्था सोर्डर नेपालले बीज वृद्धि कार्यक्रमसमेत सुरु गरेको छ ।