नेपाली फिल्ममा धुम मच्चाउन आएको बताउने गरेकी अर्पणा सिंह अहिले कहाँ छिन् ? उनलाई पहिलो 'ब्रेक' दिनेदेखि लिएर 'बबाल रोल' दिनेसम्मलाई थाह छैन । 'अर्पणालाई चोरसिपाही फिल्ममा मैले नै पहिलो ब्रेक दिएको हुँ । त्यसपछि के-के गरिन्,अहिले कहाँ छिन्, मलाई थाह छैन,' निर्देशक शोभित बस्नेत भन्छन्, 'सायद उनी आफ्नै घर (सिलगुढी) होलिन् ।'

अर्पणाले चोर सिपाहीपछि म तिमीविना मरिहाल्छु, ज्वालामुखी (एउटा आइटम गीत), कहाँ छौ कहाँ र दिदीभाइ फिल्ममा अभिनय गरेकी छिन् । उनी अभिनीत फिल्म दिदीभाइ हाल राजधानीका हलमा प्रदर्शन भइरहेको छ । आफ्नो फिल्मको हिरोइन कहाँ छिन्, दिदीभाइका निर्देशक कृष्ण चापागाईं अनि निर्माता सुनील मानन्धरलाई पनि थाह छैन रे ।

'खै, अर्पणा कहाँ छिन्, थाह छैन,' निर्माता-निर्देशकले संयुक्त रूपमा बताए, 'हाम्रो फिल्म चल्न केही ढिला भयो । हामीले त उनलाई बुलन्द रोल दिएका थियौँ । अरूका फिल्ममा राम्रो रोल पाइनन् क्यार । त्यही भएर आफ्नै घर फर्किएकी होलिन् ।' दिदीभाइमा अर्पणा नायक राजेश हमालसँग अभिनयरत छिन् । फिल्मको सुरुको केही समय उनी सकारात्मक भूमिकामा छिन् भने पछि उनी पूरै नकारात्मक भूमिकामा छिन् ।

'पोजेटिभ र नेगेटिभ रोल एकैचोटि निभाउन पाइन्,' निर्देशक चापागाईंले भने, 'पाएको रोलअनुसार उनले बबाल अभिनय गरेकी हुन् । सायद, अरूका फिल्ममा मेरो फिल्मको जस्तो काम पाइनन् । त्यही भएर पलायन भएकी हुन् कि ।'

हिरोइनको रूपमा स्थापित हुने लक्ष्य बोकेर सिलगुढीबाट काठमाडौं छिरेकी उनले आफ्नो बानी-व्यहोरा सन्तुलनमा राख्न नसकेका कारण पलायन भएकी हुन् कि भन्ने अनुमान शोभितको छ । भन्छन्, 'रूपरंग, काम गर्ने क्षमता हेर्दा त उनको सम्भावना थियो । तर, के भएर गडबडी भयो, थाह भएन ।'

अर्पणा हिरोइन बन्न आए पनि पछि जस्तोसुकै भूमिकामा पनि खेल्न थालेपछि ओरालो लागेकी हुन् । म तिमीविना मरिहाल्छुमा उनी भुवन केसीकी बहिनीको नकारात्मक भूमिकामा छिन् । कहाँ छौ कहाँ फिल्ममा पनि उनी नकारात्मक भूमिकामा छिन् ।

उनको नाम कहिले शोभित बस्नेतसँग जोडियो, कहिले भुवन केसीसँग त कहिले रोज राणासँग । हुँदाहुँदा निर्देशक दयाराम दाहालसँगको यौनजन्य भिडियो प्रकरणले पनि उनलाई पलायनको बाटो रोज्न बाध्य पारेको अनुमान फिल्मकर्मीहरूको छ ।