खेल जीवनबाट सन्यास लिए पनि अनील कुम्बलेले विश्राम गर्न पाएका छैनन् । सन्न्यास लिएलगत्तै उनले कफी टेबलमा बसेर आफ्ना खेलजीवनका तस्बिर संग्रहित किताबका पाना पल्टाए ।

त्यसपछि उनले श्रीलंकाली स्पिनर मुथैया मुरलीधरनसँग मिलेर स्पिन एकेडेमी खोल्ने योजना बनाए । भारतका सर्वाधिक विकेट टेकरले अब आफ्ना मुलुकका क्रिकेटरलाई मैदानबाहिर अपनाउने व्यवहारको पाठ पढाउने भएका छन् ।

भारतका केही क्रिकेटरको मैदानबाहिरका व्यवहार छापाका मसला बन्ने गर्छन् । कहिले समर्थकलाई पिट्ने त कहिले सुन्दरीहरूसँग खुलमखुल्ला माया गाँस्नेजस्ता व्यवहारले भारतीय क्रिकेटरको निकै आलोचना हुने गरेको छ ।

भारतीय क्रिकेट कन्ट्रोल बोर्ड (बिसिसिआई) ले पनि कुम्बलेले तयार पारेको शिक्षा कार्यक्रमलाई अगाडि बढाउने निधो गरेको छ । साथै अबदेखि क्रिकेट खेलाडीका लागि सो शिक्षा अनिवार्य गरिने पनि बोर्डले जनाएको छ । पूर्वकप्तान कुम्बलेको निर्देशनमा क्रिकेटरले व्यक्तित्व विकासका पाठ पढ्नेछन् ।

"कुम्बलेको योजनामा हाम्रा क्रिकेटरलाई सहयोग पुग्ने विषय समावेश छन्, जसमा रकम ह्यान्डलिङ्देखि अन्य खेलाडीसँग ड्रेसिङ रुममा कसरी कुरा गर्ने भन्नेसम्मका विषय छन् " बोर्डका उपाध्यक्ष राजीव शुक्लाले जानकारी दिए ।

कुम्बलेले केही महिनाअघि मुम्बईमा बिसिसिआईका अध्यक्ष शशांक मनोहर तथा अन्य उच्च अधिकारीसामु आफ्नो योजना प्रस्तुत गरेका थिए । उनको प्रस्तावका विषयमा गतसाता बोर्ड बैठकमा छलफल पनि भएको थियो ।

कुम्बलेसँग पाठ पढेबापत हरेक खेलाडीले दुई लाख ९० हजार भारतीय रुपैयाँ पनि पाउनेछन् । सो कार्यक्रम आयोजनाको जिम्मेवारी भने अनील कुम्बले स्पोर्टस प्रालिले लिनेछ भने त्यसको अनुगमन कुम्बलेले नै गर्नेछन् । सो कार्यक्रममा तत्कालका सफलता, आत्मस्वतन्त्रता, एन्टि डोपिङ तथा आर्थिक प्रबन्धनका विषयमा पढाइ हुनेछ ।

साथै सोही कार्यक्रममा कसरी अंग्रेजी बोल्ने, पत्रकार सम्मेलनमा कसरी उपस्थित हुने तथा सार्वजनिक स्थलमा कसरी आफूलाई प्रस्तुत गर्नेजस्ता कुरा पनि क्रिकेटरलाई सिकाइनेछ ।

"क्रिकेटरलाई उनीहरूको एजेन्टले बताएअनुसार चल्न बिसिसिआई इच्छुक छैन । हामी उनीहरूलाई आर्थिक उपार्जन तथा सम्झौताका विषयमा पनि जानकारी दिनेछौँ । हामीलाई यस्ता कार्यक्रमको आवश्यकता छ, जसले खेलाडीलाई सही व्यवहारको ज्ञान देओस्," शुक्लाले थपे ।

कुम्बले भने सो कार्यक्रममा सबै अन्तर्राष्ट्रिय, पहिलो श्रेणी तथा आइपिएलका खेलाडीसमेत सहभागी होऊन् भन्ने चाहन्छन् । तर, बिसिसिआई भने अहिले करारमा रहेका खेलाडीका लागि मात्रै सो कार्यक्रम आयोजना गर्न चाहन्छ ।

आइपिएलको पहिलो संस्करणमा हरभजन सिंहले श्रीशान्तलाई मैदानमा नै चड्कन हिर्काएको तथा वेस्टइन्डिजको पवमा खेलाडीले समर्थकसँग झगडा गरेकाजस्ता कारणले गर्दा बिसिसिआई सो कार्यक्रम आयोजना गर्न इच्छुक देखिएको हो ।

"खेलाडीले आफूलाई मैदानभित्र र बाहिर राम्रो बनाऊन् भन्ने आशयका साथ बिसिसिआईले सो कार्यक्रम आयोजना गर्न लागेको हो । त्यसका लागि अनील कुम्बलेभन्दा राम्रो गुरु अर्को कोही हुन सक्दैन," शुक्लाले भने ।