भारत, २७ अगष्ट / भारतको राजधानी नयाँ दिल्लीमा बिहिवार किसानहरुले प्रर्दशन गरेका छन् । दिल्लीलाई आगरासँग जोड्ने एक्सप्रेस सडक "ताज एक्सप्रेस वे" बनाउनका लागि भुमि अधिग्रहणको विरोध गरिरहेका किसानले विरोध प्रर्दशन गरेका हुन् । किसानहरुले संसद घेराउ समेत गरेका छन् ।

यसै मागलाई लिएर किसानहरुले बुधवार उत्तर प्रदेश बन्द गरेका थिए ।

अधिग्रहण गर्न लागिएको जग्गाको मुआब्जा बढाउन माग गर्दै किसानहरुले केही साता यता मथुरा, अलिगढ, आगरा सहित विभिन्न स्थानमा प्रर्दशन गर्दै आएका छन् । कयौं किसान भने आफ्नो जग्गा दिन चाहदैनन् ।

किसानको आन्दोलनमा अहिलेसम्म तीन जनाको सुरक्षाकर्मीको गोली लागेर मृत्यु भइसकेको छ ।

यसपछि उत्तर प्रदेश सरकारले मथुरा तथा अलिगढका किसानलाई प्रतिवर्ग मिटर ४ सय ९० रुपैयालाई बढाएर ५ सय ७० मुआब्जा दिने निर्णय गरेको थियो ।

तर, सरकारको यस निर्णयलाई किसानले स्विकार गरेनन् । उनीहरुले आफ्नो आन्दोलन जारी राखेका छन् ।

किसानको आन्दोलनलाई कयौं राजनीतिक दलले समर्थन गरेका छन् । यस आन्दोलनलाई भारतीय जनता पार्टी(भाजपा), समाजवादी पार्टी, वामपन्थी दल सहित अन्य दलले समर्थन गरेका छन् ।

सत्तारुढ कंग्रेस दलका महासचिव राहुल गान्धीले अलीगढमा आन्दोलन गरिरहेका किसानलाई भेटेका उनीहरुको आन्दोलन प्रति आफ्नो समर्थन व्यक्त गरेका छन् ।