पाकिस्तान, २८ अगष्ट / पाकिस्तानको दक्षिणी सहरमा बाढीले पानी किनारा नाघेर सहरतिर पसेपछि तीन लाख मानिसलाई अन्यत्र सार्न आदेश दिइएको छ　।

महिनाअघिदेखि भएको भारी मनसुनी वर्षासँगै आएको बाढी उत्तरबाट दक्षिणी क्षेत्रतिर फैलिरहेको छ　। बाढीले देशको पाँच भागको एक भागलाई प्रभावित बनाएको छ　। यसैगरी, बाढीबाट करिब एक करोड ७० लाख जनसंख्यालाई असर पारेको छ　।

उच्च अधिकारी मन्जुर शेखका अनुसार बाढीले फकिर जोगोठ गाउँमा तटबन्ध भत्काएपछि ठाट्टा सहरका बासिन्दालाई बिहीबार राति अन्यत्र सार्न आदेश दिइएको थियो　।

"बाढी सहरतिर बढिरहेकाले गाउँका कम्तीमा ७० प्रतिशत अर्थात् तीन लाख मानिसलाई सुरक्षित ठाउँमा सारियो," उनले भने　। उनले सेनाका इन्जिनियरहरू तटबन्ध मर्मत गर्न सफल हुने विश्वास व्यक्त गरे।

तटबन्ध निर्माण नभएमा ठाट्टा पूरै डुब्ने सम्भावना रहेको पनि उनले बताए　।　यसअघि वरिपरिका सुजवाल, मिरपुर वोथारो र दार्रो सहरका चार लाख मानिसलाई अन्यत्र सारिएको थियो　।