फोर्बस पत्रिकाका अनुसार रुसी टेनिस सुन्दरी मारिया सारापोभा विश्वमा सर्वाधिक आयआर्जन गर्ने महिला खेलाडी हुन् । गत वर्ष सारापोभाले कुल दुई करोड ४५ लाख अमेरिकी डलर कमाएकी थिइन्, जसमा १० लाख अमेरिकी डलर पुरस्कार रकमबापत थियो भने बाँकी प्रायोजनबाट ।

२००४ मा १७ वर्षकै उमेरमा विम्बल्डनको उपाधि जितेपछि रातारात टेनिस स्टार बनेकी २३ वर्षीया सारापोभालाई अहिले विश्वभरिका ब्रान्डबाट प्रायोजन प्रस्ताव आउने गरेको छ । जसमा उनले क्यानन, मोटोरोला, टिफानी, ल्यान्ड रोभर तथा कोलगेट पालोलिभका लागि प्रचार गर्छिन् । तर, उनको सबैभन्दा राम्रो प्रायोजक भने नाइक हो, सो कम्पनीले गत जनवरीमा उनलाई आठ वर्षका लागि सात करोड अमेरिकी डलरमा करारमा लिएको छ । नाइककै सहनिर्माता "को हान"ले समेत उनलाई ब्याग तथा जुत्ता प्रचारका लागि थप रकम दिने गरेको छ ।

पछिल्लो एक दशकदेखि महिला टेनिसमा दबदबा राखेकी विलियम्स दिदीबहिनी भने दोस्रो तथा तेस्रो स्थानमा छन् । चोटका कारण युएस ओपनमा नखेल्ने घोषणा गरेकी सेरेना दोस्रो स्थानमा छिन् । सेरेनाको वाषिर्क आम्दानी दुई करोड २० लाख डलर छ भने दिदी भेनसको एक करोड ५४ लाख डलर भएको म्यागेजिनले उल्लेख गरेको छ ।

फोब्र्सका अनुसार फोरमुला वानकी डानिसा प्याटि्रक चौथो स्थानमा छिन् । विज्ञापन कम्पनीसँग खासै सम्बन्ध नराखेकी प्याट्रिकको वार्षीक आम्दानी एक करोड २० लाख डलर छ । २८ वर्षीया प्याट्रिकले गत सिजनमा एक उपाधि जितेकी थिइन् । तर, रेसिङ कम्पनीको वार्षीक आम्दानीको १० प्रतिशत बोनस उनले प्राप्त गर्न सफल भइन् ।

यता, स्केटिङकी एक नम्बर चिनियाँ खेलाडी किम युङ ना पाँचौँ स्थानमा छिन् । सन् २०१० को विन्टर ओलम्पिकमा स्वर्णपदक जितेकी किमको आम्दानी ९७ लाख डलर रह्यो । १९ वर्षीया किम हुन्डाई, नाइक तथा सामसुङ कम्पनीसँग आबद्ध छिन् । दुई वर्षपछि लन्डनमा हुने ओलम्पिक प्रतियोगितामा उनले विश्व किर्तिमान कायम गर्दा मुख्य प्रायोजक कुकिमन बैंकले एक करोड डलर बोनस दिने घोषणा गरेको छ । यदि किमले विश्व किर्तिमान राखिन् भने दुई वर्षपछि सर्वाधिक धनी महिला बन्नेछिन् ।

यसैगरी, गल्फर अनिका सोरेन्टान ८० लाख डलर कमाउँदै छैटौँ स्थानमा छिन् । ३९ वर्षीया सारेन्टान आठपटक महिला एलपिजिए वर्ष खेलाडी घोषित भइसकेकी छिन् । उनी कालावे, कटर एन्ड बुक, लेक्सस तथा रोलेक्स विश्वप्रसिद्ध कम्पनीसँग आबद्ध छिन । खेलबाहेक उनको अर्को रुचि भनेको गल्फ कोर्स डिजाइन गर्नु पनि हो ।

सर्वाधिक धनी महिला खेलाडीको सूचीमा पूर्वएक नम्बर महिला खेलाडी अना इभानोभिकले सातौं स्थान रक्षा गरेकी छिन् । २२ वर्षया अनाको वार्षीक आम्दानी ७२ लाख छ । सन् २००८ की फ्रेन्च ओपन विजेता अना विभिन्न वेबसाइटमा चर्चित महिला टेनिस खेलाडी पनि हुन् ।

यता, टेनिसकै जेलिना जान्कोभिक ५३ लाख डलर कमाइ गर्दै आठौँ स्थानमा रहिन् । २५ वर्षीया जेलिनाले टेनिसमा एक कीर्तिमान राखेकी छिन् । कुनै पनि ग्रान्डस्लाम उपाधि नजिती एटिपी वरियताको एक नम्बर ताज पहिरिने उनी पहिलो महिला हुन् । अघिल्लो वर्ष उनले चाइनिज बेस कम्पनी एन्थासँग सम्झौता गरेकी थिइन् ।

गल्फ पाउला क्रेमेरोले ५२ लाख डलर आम्दानी गर्दै नवौँ स्थान हात पारेकी छिन् । २४ वर्षीया क्रेमेरो सन् २०१० को आधासत्रसम्म चोटका कारण कुनै पनि पिजिए प्रतियोगितामा भाग लिएकी छैनन् । गल्फकै लोरेना ओचा दसौँ स्थानमा छिन् । महिला गल्फ वरियतामा शीर्ष स्थानमा रहेकी ओचको वाषिर्क आम्दानी ५० लाख डलर छ ।

फोर्ब्सको सर्वाधिक धनी तथा शक्तिशाली महिला र पुरुष कलाकार, खेलाडी तथा संगीतकर्मीको सूचीमा भने सारापोभा ७६ बाट ८१औँ स्थानमा झरेकी छिन् ।