अमेरिका, ३० अगष्ट / सात वर्षपछि हजारौँ अमेरिकी सेनाको मृत्यु खेपेर बल्ल अमेरिकी सेना इराकबाट फर्कंदै छ । अमेरिकी राष्ट्रपति बाराक ओबामाले गत शनिबार यस्तो निर्णय सुनाएका हुन् ।

"युद्ध सकिँदै छ, बस् कुरो यत्ति हो," ओबामाले रेडियो तथा वेबसाइटमार्फत राष्ट्रलाई सम्बोधन गर्दै भने । आउँदो बुधबारदेखि संयुक्त राज्य अमेरिकाले आफ्नो लडाकु मिसन सक्तै छ र अर्को वर्षको अन्त्यसम्ममा त्यस मुलुकबाट आफ्ना सारा सैनिक टुकडी फिर्ता बोलाउँदै छ ।

ओबामाले आफू राष्ट्रपति पदका लागि प्रत्याशी हुँदा इराक युद्ध समाप्त गर्ने वचन दिएको र राष्ट्रपति हुँदा त्यही वचन पूरा गरेको बताए । "मैले ह्वाइट हाउस सम्हालेदेखि ६० हजार सैनिकलाई घर फिर्ता ल्याइयो, सयौँ सैन्य शिविर बन्द गरियो । इराकको थुप्रै भागमा इराकीले नै सुरक्षा नेतृत्व गरिरहेका छन्,'"उनले भने ।

लडाकु मिसन सकिएपछि, करिब ५० हजार अमेरिकी सैनिकले इराकमा तालिम तथा सहयोग दिनेछन्, प्रतिआतंकवादी मिसनलाई सघाउनेछन् र त्यहाँका अमेरिकी नागरिक तथा सैनिक प्रयासको सुरक्षा गर्नेछन् ।

मंगलबार ओबामाले ओभल अफिसमा इराकमा अमेरिकी लडाकु मिसनको अन्त्यसम्बन्धी एक सम्बोधन गर्ने कार्यक्रम छ । ह्वाइट हाउसका प्रवक्ता बिल बर्टनले राष्ट्रपतिले इराकमा मिसन अन्त्य गर्ने दिनको महत्त्व तथा अमेरिकाको इराक नीतिबारे कुराकानी गर्ने जनाएका छन् ।