वासिंगटन, ३० अगष्ट / भूतपूर्व अमेरिकी राष्ट्रपति जिम्मी कार्टर उत्तर कोरियामा बन्दी बनाइएका एकजना अमेरिकी नागरिकलाई मुक्त गराई सँगै लिएर घर फर्केका छन् 　।

कार्टर र जनवरीदेखि उत्तर कोरियामा थुनिएका एइजालोन महली गोम्स कार्टर गएकै गैरसैनिक जेटमा चढी स्वदेश फर्केका हुन् 　। उनी उत्तर कोरियाली सरकारसँग वार्ता गरी गोम्सलाई मुक्त गर्न प्योङयाङ गएका थिए 　।

बोस्टननिवासी तीसवर्षे गोम्स कुनै वेला दक्षिण कोरियामा अंग्रेजी भाषा पढाउने गर्थे र अवैध किसिमले उत्तर कोरियामा प्रवेश गरेको आरोपमा समातिएका थिए 　।

अप्रिल ६ मा उनलाई ७ लाख अमेरिकी डलर जरिवानाका साथै आठ वर्ष कारावासको सजाय सुनाइएको थियो 　। कार्टर कुनै पनि अमेरिकी सरकारी अधिकारी नलिएरै व्यक्तिगत हैसियतमा प्योङयाङ गएका थिए ।

शान्तिका लागि नोबेल पुस्कारद्वारा सम्मानित कार्टरले यसअघि १९९४ मा उत्तर कोरियाको भ्रमण गरेका थिए 　।

उत्तर कोरियाको आधिकारिक समाचार संस्था केसिएनएका अनुसार, कार्टरले गोमले अवैध किसिमले उत्तर कोरियामा प्रवेश गरेकोमा त्यहाँका सर्वोच्च जनसभाको अध्यक्षमण्डलका अध्यक्ष किम योङ नामसमक्ष क्षमायाचना गरेका थिए र अब आइन्दा यस्तो घटना नदोहोरिने आश्वासन दिएका थिए ।

उनले किमसँग उत्तर कोरियाका सर्वोच्च नेता किम जोङ इलसमक्ष गोमलाई विशेष क्षमदान दिई घर जान दिन आग्रह गरेका थिए 　।