मेक्सिको, ०१ सेप्टेम्बर/  मेक्सिको प्रहरीले कुख्यात लागु औषध तस्कर एडगार भाल्डेज भिल्लारिअललाई पक्राउ गरेको छ।

अमेरिकामा जन्मेका भिल्लारिअलको गिरफ्तारी मेक्सिको सरकारको लागु औषध तस्करविरुद्धको शैन्य अभियानको लागि एक ठूलो सफलताको रुपमा लिइएको छ।

बार्बी उपनामले चिनिने भिल्लारिअल मेक्सिकोमा सबैभन्दा कुख्यात लागु औषध तस्कर मध्ये एक भएको मेक्सिकोका अधिकारीहरुले बताएका छन्।

मेक्सिकी-अमेरिकी मूलका बार्बीलाई अमेरिका तथा मेक्सिको दुवैमा सबैभन्दा खोजी गरिएका ब्यक्तीको सूचीमा राखिएको थियो।

उनी विरुद्ध मेक्सिको र अमेरिकामा लागु औषध तस्करी बाहेक हत्या गरेको र हिंसा भड्काएको लगायतका गंभिर प्रकृतिका सयौ अभियोग लगाइएको बताइएको छ।

सैंतीस वर्षीय बार्बी मेक्सिकोको गुप्तचर विभागले गरेको कारवाहीका क्रममा गिरफ्तारीमा परेका हुन्।  अमेरिकाले बार्बीको गिरफ्तारीको लागि सूचना दिने जो कोहीलाइ २० लाख डलर इनाम प्रदान गरिने घोषणा गरेको थियो।

विश्वको सबैभन्दा बढी लागु औषध सम्बद्ध हिंसा हुने मेक्सिकोमा लागु औषध तस्कर र सुरक्षाकर्मीविच भएको भिडन्तका क्रममा सन २००६ को डिसेम्बर यता २५ हजारभन्दा बढी मानिसको मृत्यु भैसकेको छ।