अमेरिका, ०१ सेप्टेम्बर/  ईराकका प्रधानमन्त्री नुरी अल मलिकीले इराकमा अमेरिकी सेनाको कम्ब्याट अपरेसन सकिएपछि इराक स्वाधिन भएको बताएका छन्।

सन् २००१ देखि इराकमा आफ्नो कारवाही जारी राखेको अमेरिकी सेनाले आज मध्यरात देखि आफ्नो सबै आक्रमक कारवाही अन्त्य गर्दै छ।

अमेरिकी सेनाले इराक छाडेपछि इराकको सम्पूर्ण सुरक्षाको जिम्मेबारी इराकी सेनाले लिने पनि प्रधानमन्त्री मलिकीको भनाइ छ। अमेरिकी सेनाले इराक छाड्ने दिनको पूर्व सन्ध्यामा अमेरिकी उपराष्ट्रपति आघोषित इराक भ्रमणका क्रममा बग्दाद पुगेका छन्।

बाइडनसँगको संयुक्त पत्रकार सम्मेलनमा बोल्दै मल्लिकीले आजको दिन देखि इराक स्वाधिन र सार्वभौम भएको बताए। इराकमा अमेरिकी सेनाको कारवाही समाप्त गरेको अवसरमा अमेरिकी राष्ट्रपति बाराक ओबामाले अमेरिकी तथा इराकी जनतालाई सम्बोधन गर्ने अपेक्षा गरिएको छ।

इराकमा तैनाथ अमेरिकी सेनाले इराक छाड्ने तयारी गरिरहँदा पछिल्लो समय इराकमा हिंसात्मक आक्रमण बढेपछि त्यहाँको सुरक्षाको विषयलाई लिएर इराकीहरु चिन्तित देखिन्छन्। 

अगष्ट महिनामा मात्र इराकका विभिन्न स्थानमा भएका आक्रमणमा परी कम्तिमा पचासी जनाको मृत्यु भएको छ।