काठमाण्डौ, ०४ सेप्टेम्बर , १९ भाद्र / व्यवस्थापिका संसदमा भोलि हुने प्रधानमन्त्रीको निर्वाचनमा कसलाई समर्थन गर्ने वा तटस्थ बस्ने भन्ने विषयमा छलफल गर्न मधेसवादी दलसम्वद्व संयुक्त लोकतान्त्रिक मधेसी मोर्चाको बैठक आज बस्दै छ ।

मोर्चाको बैठक सिंहदरवारमा दिउँसो बस्ने बताइएपनि समयको टुङ्गो नलागेको मधेसी जनअधिकार फोरम लोकतान्त्रिकका प्रमुख सचेतक रामजनम चौधरीले बताउनुभयो ।

उहाँका अनुसार मोर्चाले सार्वजनिक गरेको अवधारणापत्रमा माओवादी सकारात्मक रहेपनि लडाकु समायोजन र शान्ति प्रक्रियाको विषयमा मोर्चाले माओवादीको स्पष्ट धारणाको अपेक्षा गरेको छ ।

४ महिनाभित्र लडाकु समायोजनाको काम सक्ने गरी कार्यतालिका सार्वजनिक गर्न सहमत भएमा र स्वायत्त मधेस एक प्रदेशको विषयमा समर्थन नगरे पनि सकारात्मक प्रतिक्रिया जनाएपछि भोलिको प्रधानमन्त्रीको चुनावमा मोर्चाले माओवादीलाई समर्थन गर्ने सोच बनाएको छ ।

५ पटकसम्मको चुनावमा तटस्थ बस्दै आएको मोर्चाले आशा गरेअनुसारको प्रतिक्रिया माओवादीले नदिएपछि भने फेरि मोर्चा तटस्थको निर्णयमा पुग्ने लोकतान्त्रिकका प्रमुख सचेतक चौधरीले जानकारी दिनुभयो ।

मोर्चाको बैठक हिजो बस्ने तय गरिएको भएपनि सदभावनाका अध्यक्ष राजेन्द्र महतो काठमाण्डौं उपत्यका बाहिर रहेकाले आज बस्न लागेको हो ।

मधेसी जनअधिकार फोरम नेपाल फोरम, लोकतान्त्रिक तराई मधेस लोकतान्त्रिक र सदभावना पार्टी नेपालका अध्यक्ष सहित २-२ जनाको बैठकमा सहभागिता रहने छ ।

अहिलेसम्म मोर्चाले आधिकारिक रुपमा कुनै पनि पक्षलाई मत दिने निर्णय गरिनसकेको र यसअघिको तटस्त बस्ने अडान कायम रहेको मोर्चा आवद्ध दलका नेताहरुले बताएका छन् ।