काठमाण्डौ, ०४ सेप्टेम्बर , १९ भाद्र / दलहरु आ-आफ्नै अडानमा रहेका कारण भोलि पनि मुलुकले प्रधानमन्त्री नपाउने लगभग निश्चित नै बनेको छ ।

माओवादीलाई समर्थन गर्ने तयारीमा रहेका दुई फोरम भित्रै विवाद र टेपकाण्ड सार्वजनिकले माओवादीको सम्भावना पनि कमजोर बन्दै गएको छ ।

नेकपा एमाले तटस्त बस्ने पक्का भएपनि परिणाम आउने सम्भावना कम छ  । लगातार पाँच पटकको चुनावबाट पनि प्रधानमन्त्री चुन्न नसकेपछि व्यवस्थापिका संसदमा भोलि छैटौपटकको चुनाव हुँदैछ ।

दलहरु आ-आफ्नै अडानमा कायम रहेपछि संसदबाट प्रधानमन्त्री चुन्न नसकेको हो । छैटौपटकको चुनाव हुन एकदिन बाँकी रहँदा पनि दलहरुले सहमति जुटाउन सकिरहेका छैनन् ।

भोलि हुने चुनाव अघि नै सहमति जुटाउने भन्दै नेकपा एमालेले तयार पारेको सातबुँदे आधारपत्रबाट पनि कुनै निष्कर्ष निस्कने अवस्था देखिएको छैन ।

सहमतिका लागि एमालेले कार्यदल गरे तापनि मुख्य दलहरुसँग प्रभावकारी रुपमा कुनै छलफल हुन सकेको छैन । भदौ ७ गते भएको पाँचौपटक चुनावपछि एकीकृत नेकपा माओवादी केन्द्रीय कमिटीको बैठकमा र नेपाली काङ्ग्रेस महाधिवेशनको तयारी जुटेपछि दलहरुबीच दुई पक्षीय वार्ताहरु पनि यो बीच हुन सकेन ।

आज पनि   मुख्य दलहरुबीच अहिलेसम्म कुनै पनि औपचारिक छलफलको तयारी नरहेको दलका नेताहरुले बताएका छन्  ।