बेलायत, ०४ सेप्टेम्बर /  बेलायतका पूर्व प्रधानमन्त्री टोनी ब्लेयरले वर्तमान विश्वका लागि इस्लामिक अतिवादी सबैभन्दा ठूलो खतरा बनेको बताएका छन्।

उनले बीबीसीलाई दिएको एक अन्तरवार्तामा इस्लामिक अतिवादीमा आफ्नो विचार  र फाइदाको लागि जे पनि गर्न तयार हुने मानसिकता रहेको बताए।

उनले इस्लामिक अतिवादीले मौका पाएमा युद्ध जित्नको लागि रसायनिक , जैविक र आणविक हतियारको प्रयोग गर्नसक्ने समेत बताएका छन्। ब्लेयरले इराक र अफ्गानिस्तानको युद्धमा बेलायतको नेतृत्व गरिसकेका छन्।

उनले अफ्गानिस्तान, प्यालेष्टाइन, इराक , चेचन्या र कस्मिरमा इस्लामिक अतिवादी सक्रिय रहेको बताएका छन्। अन्तरवार्तामा उनले इरानको आणविक कार्यक्रमको विरोध गर्दै इस्लामिक अतिवादीलाई इरानले प्रोत्साहित गर्ने गरेको आरोप लगाएका छन्।

इरान इस्लामिक अतिवादीलाइ प्रोत्साहित गर्ने देशहरुको सूचीमा पहिलो स्थानमा रहेकोले उसलाई कुनै पनि हालतमा आणविक हतियार विकास गर्ने मौका दिन नहुनेमा ब्लेयरले जोड दिएका छन्।

ब्लेयरले सन् २००१ को सेप्टेम्बर ११ मा अमेरिकामा भएको आतंकवादी आक्रमणपछि आफ्नो विदेश नीति बदलिएको बताएका छन्। उनले आतंकवादलाई परास्त गर्न शक्ति राष्ट्रहरुले आफ्नो विदेश नीतिमा परिवर्तन गर्न समेत सुझाव दिएका छन्।