रुस, ०७ सेप्टेम्बर / रुसको दागेस्तानस्थित स्थानीय सैन्य आधारशिविरमा आइतबार बिहानै दुई आत्मघाती बम विस्फोट हुँदा पाँचको मृत्यु भएको छ । यसैगरी, विस्फोटमा अन्य ३९ घाइते भएका छन् ।

उत्तरी ककेससको बुइनास्कक नगरमा रहेको सैन्य आधारशिविरमा आत्मघाती आक्रमणकारीले विस्फोटक सामग्रीले भरिएको कार तीव्र वेगमा १३६ नम्बरको ब्यारेकको मूलद्वारको बाटोमा पहिलो विस्फोट गराएका थिए ।

पहिलो विस्फोटमा घटनास्थलमै तीनको मृत्यु भएको थियो । यसैगरी, पहिलो विस्फोटमा २६ घाइते भएको दागेस्तानका राज्यको गृह मन्त्रालयले जनाएको छ ।

बम विस्फोटलगत्तै पछि उद्धारकर्मी तथा नुसन्धानकर्ता घटनास्थल पुग्न नपाउँदै सोही ठाउँनजिकै अर्को विस्फोट भएको थियो । दोस्रो विस्फोटमा थप व्यक्तिको मृत्यु भयो । घाइतेमध्ये धेरैको गम्भीर अवस्था रहेको छ ।

रुसको मुख्यतया मुसलमानी बाहुल्य क्षेत्र चेचन्या, दागेस्तान र इङ्गुसेतियामा सुरक्षाकर्मी तथा रुसी आधिकारिक प्रतिनिधिलाई लक्षित गरी आक्रमण तथा हत्याका घटना हुने गरेका छन् ।

त्यस्तै, शनिबार दागेस्तानका राष्ट्रिय नीति, वैदेशिक सम्बन्ध र सूचना तथा सञ्चारमन्त्री ब्रेकमुर्जा ब्रेकमुर्जायेभ चढेको गाडी क्षेत्रीय राजधानी मख्चकलामा विस्फोट हुँदा चालकको मृत्यु भएको छ । यस घटनामा अंगरक्षक पनि नराम्ररी घाइते भएका थिए ।