कोरिया, ०७ सेप्टेम्बर / दक्षिण कोरियाका विदेशमन्त्री यु म्युङ-ह्वानले आफ्नै मन्त्रालयका लागि आफ्नी छोरीलाई भर्ना गरेको विषयलाई लिएर राजीनामा दिएका छन्　।

युले राष्ट्रपति ली म्युङ-बाकसमक्ष राष्ट्रपति कार्यालयका प्रमुखमार्फत राजीनामा प्रस्तुत गरेको जानकारी विदेश तथा व्यापार मामला मन्त्रालयले जनाएको हो　।

मन्त्रालयका अनुसार विदेशमन्त्री युले आफ्नी छोरीका कारणले देशमा विवाद सिर्जना भएकोमा दुःख व्यक्त गर्दै सो विषयको जिम्मेवारी आफूले लिई पदत्याग गरेको बताएका छन्　।

यस विषयलाई लिएर युले शुक्रबार क्षमा याचना गर्दै बाबुले नेतृत्व गरेको मन्त्रालयमा छोरीलाई जागिर लगाउन उचित नहुने भएकाले आफ्नी छोरीले अब सो काम स्वीकार नगर्ने बताए　।

विदेश मन्त्रालयले छनोट प्रक्रिया स्वच्छ तथा पारदर्शी भएको तथा व्यापारविज्ञका रूपमा मन्त्री युकी छोरी अनुभवी तथा योग्य रहेकाले छनोट गरिएको भनी प्रतिवाद गरेको थियो　।

उनले २००६ देखि तीन वर्षसम्म मन्त्रालयमा व्यापारविज्ञका रूपमा कम गरी गत वर्ष बिहे हुनुअघि मात्र सेवा छाडेको हुनाले छनोट प्रक्रियाको मापदण्ड पूरा गरेको बताइएको थियो　।

तर, मन्त्री युको क्षमा याचना तथा मन्त्रालयको स्पष्टीकरणले पनि जनसाधारणमा मन्त्रीकी छोरीले प्राथमिकता पाएको आशंकालाई समाप्त पार्न सकेन　। विवाद बढेपछि शुक्रबार राष्ट्रपति ली म्युङ-बाकले सो मामलाको अनुसन्धानका लागि निर्देशन दिएका थिए　।