काठमाण्डौ, ०७ सेप्टेम्बर ,२२ भाद्र / ३४ औ प्रधानमन्त्रीका लागि आज सातौ पटक भएको निर्वाचनमा कुनै पनि प्रत्यासीले निर्वाचित हुन आवश्यक ३ सय मत प्राप्त गर्न नसकेपछि सातौ पटकको निर्वाचन पनि परिणाम विहिन भएको छ ।

व्यवस्थापिका संसदमा मंगलबार भएको प्रधानमन्त्रीको निर्वाचनमा प्रधानमन्त्रीका प्रत्यासीद्धय पुष्पकमल दाहाल र रामचन्द्र पौडेलले निर्वाचित हुन आवश्यक बहुमत प्राप्त गर्न नसकेकाले निर्वाचन आठौ चरणमा प्रवेश गरेको छ ।

प्रधानमन्त्रीमा निर्वाचित हुनका लागि कुल संविधान सभाका सदस्यको ५१ प्रतिशत मत ल्याउनु पर्ने संवैधानिक व्यवस्था रहेको छ । जसअनुसार संसदमा ५सय ९९ सदस्य रहेकाले ३ सय मत प्राप्त गर्नु पर्ने हुन्छ ।

सविधान सभामा कुल छ सय १ सभासद भए पनि तराई मधेस लोकतान्त्रिक पार्टीबाट एकिकृत नेकपा माओवादीमा प्रवेशपछि पार्टीले कार्वाही गरेका रामकुमार शर्मा र माओवादीकै अर्की सभाषद रामकुमारी यादवको ग्यासँ लिक भएर लागेको आगोमा परेर मृत्य भएपछि २ सभाषद पद खाली भएको हो ।

आजको निर्वाचनमा गरिएको पहिलो मतविभाजनको क्रममा एकीकृत नेकपा माओवादीका उम्मेदवार अध्यक्ष पुष्पकमल दाहालले २ सय ५२ मत प्राप्त गर्नु भएको थियो ।

दाहाललाई प्रधानमन्त्री बनाउने प्रस्ताव बहुमतले अस्विकृत भएको छ । उहाँको विपक्षमा १ सय १० र तटस्थ १ सय ५९ मत रहेको थियो । निर्वाचित हुनका लागि आवश्यक ३ सय मत प्राप्त गर्न नसके पछि प्रचण्डको प्रस्ताव अस्वीकृत भएको घोषणा गर्दै सभामुख नेम्वङले अर्का कांग्रेसका प्रत्यासि रामचन्द्र पौडेलको प्रस्तावलाई निर्णयार्थ प्रस्तुत गर्नु भएको थियो ।

त्यसपछि पौडेलको पक्षमा भएको मतदानको पक्षमा १ सय १९ मत प्राप्त भएको थियो । उहाँको विपक्षमा २ सय ४५ र तटस्थ १ सय ५१ मत रहेको थियो । पौडेलको पक्षमा मतदान हुँदा ५ सय १५ सभासदले भाग लिएका थिए ।

आजको बैठकमा उपेन्द्र यादव नेतृत्वको मधेसी जनाधिकार फोरम नेपालका सभासदहरुले पक्ष, विपक्ष र तटस्थ मध्ये कुनैमा पनि मत जाहेर नगरी यथास्थानमै बसेका थिए । बैठकमा विजयकुमार गच्छदार नेतृत्वको फोरम लोकतान्त्रिकका अध्यक्ष विजयकुमार गच्छदारसहित अधिकांश सभासदहरु बैठक स्थलमा अनुपस्थित रहेका थिए ।

कुनै पनि प्रत्यासिले आवश्यक मत प्राप्त गर्न नसके अन्तरिम संविधान २०६३ को धारा ३८ को उपधारा २ बमोजिम सभामुखले पुनः निर्णायार्थ प्रस्तुत गर्ने प्रयोजनका लागि अर्को बैठक बोलाउनुपर्ने प्रावधान छ । अर्को बैठक आगामि असोज १० गते बोलाउने अनौपचारिक सहमति दलहरुवीच यसअघि नै भईसकेको छ ।

आजको बैठकमा अर्थमन्त्री सुरेन्द्र पाण्डेले आर्थिक विधेयक पहिलो संसोधन विधेयक पेश गर्नु भएको थियो ।