काठमाण्डौ, ०८ सेप्टेम्बर ,२३ भाद्र / आज भाद्र कृष्ण अमावस्या अर्थात् कुसे औंसीका अवसरमा नेपाल राज्यभर हिन्दू धर्मावलम्बीहरु वर्ष भरि देवकार्य तथा पितृकार्यमा पवित्र मानी प्रयोग गरिने कुस घर घरमा भित्र्याउँदै छन् ।

आजका दिन पितृदेवो भव भन्ने मान्यताअनुसार आफ्ना बाबुलाई मन पर्ने गरी काठमाडौंको उत्तरपट्टि रहेको गोकर्णेश्वर महादेवको मन्दिरमा गई सम्झनास्वरुप श्राद्ध तर्पण आदि गर्ने चलन छ ।

आजै नेपालका राष्ट्रिय विभूति मोतीराम भट्ट जन्मजयन्ती विभिन्न साहित्यिक कार्यक्रमहरुको आयोजना गरी मनाइँदैछ ।

बिसं. १९२३ साल भाद्र कुसे औंसीका दिन जन्मेर १९५३ साल भाद्र कुसे औंसीकै दिन ३० वर्षको उमेरमा निधन हुनुभएका मोतीराम भट्ट माध्यमिक कालीन नेपाली साहित्य र शृङ्गारिक धाराका प्रवर्तक हुनुहुन्छ ।