काठमाण्डौ, ०८ सेप्टेम्बर ,२३ भाद्र / पश्चिम पाल्पाको भुवनपोखरीदेखि सदरमुकाम तानसेन आउँदै गरेको लु १ ज १०६८ नम्बरको जीप सोमादी -४ गेदाबासमा दुर्घटना हुँदा २३ जना घाइते भएका छन्। घाइतेमध्ये ४ को अवस्था गम्भीर रहेको प्रहरीले जनाएको छ।

आधा दर्जन गैरसरकारी संस्थाले तानसेनमा आयोजना गरेको जिल्लास्तरीय तीज गीत प्रतियोगितामा सहभागी हुन आएकाहरु दुर्घटनामा परेका हुन्।

गम्भीर घाइते हुनेमा जीप चालक भुवनपोखरी - ६ पेलाबासका ४५ वर्षीय श्रवण श्रेष्ठ, ३९ वर्षीया गुणीकुमारी दर्लामी, २५ वर्षीया माया सोमै र ५० वर्षीया वेलकुमारी सोमै रहेको प्रहरीले जनाएको छ।

गम्भीर ४ सहित २३ जना तानसेनस्थित मिसन अस्पतलमा उपचारका लागि भर्ना भएका छन्। जीपको ब्रेक फेल भएर सडकदेखि सय मिटर तल खसेको प्रहरी नायव उपरीक्षक पवनकुमार गिरीले बताए।

घटनास्थल सदरमुकाम तानसेनदेखि ४० किलोमिटर पश्चिममा पर्दछ।

यसैगरी, मोटरसाइकलले आज दिउसो ठक्कर दिँदा पर्वतमा तीन बालबालिका घाइते भएका छन् भने घाइतेका आफन्तले बाग्लुङ-पोखरा सडक अवरुद्ध पारेका छन्।

पोखराबाट पर्वतको कुश्मा बजारतर्फ आउँदै गरेको ग ३ प ६७ ५७ नम्बरको मोटरसाइकलले ठक्कर दिँदा पर्वत चुवा- ५ की १० वर्षीय रविना सुवेदी, ७ वर्षीय पुष्पा सुवेदी र ४ वर्षीय गणेश सुवेदी घाइते भएका हुन्।

घाइते बालबालिकामध्ये दुईको  पर्वत अस्पतालमा  उपचार भइरहेको छ भने गम्भीर घाइते रविनाको थप उपचारका लागि पोखरा पठाएको पर्वत प्रहरीले जनाएको छ।

घाइते बालबालिकाका आफन्तले उपचार र क्षतिपूर्तिको माग गर्दै बाग्लुङ-पोखरा राजमार्गको चुवा खण्डमा यातायात अबरुद्ध पारेका छन्।

मोटरसाइकल चालक पर्वतको लुंखुदेउराली गाविस- २ का द्रोणराज पौडेललाई प्रहरीले नियन्त्रणमा लिएर अनुसन्धान सुरु गरेको छ।