विकिपिडिया र गुगलजस्ता ठूला सेवा प्रदायक अनलाइन कम्पनीको कडा विरोधपछि कंग्रेस पछाडि हटेको हो । पाइरेसी बढेको भन्दै अमेरिकी सदनमा विधेयक पेस भएपछि इन्टरनेट प्रदायक संस्थाहरूले गत बुधबार आफ्ना साइट बन्द गरेका थिए ।

 

अमेरिकाको माथिल्लो सदनमा बहुमतमा रहेका नेता ह्यारी रिडले प्रोटेक्ट आइपी एक्ट (पिपा) मा बिहीबार हुने मतदान तत्कालका लागि रोकिएको बताएका छन् । संसद्को कानुनसम्बन्धी समितिका अध्यक्ष लामर स्मिथले पनि स्टप अनलाइन पाइरेसी एक्ट (सोपा) आमसहमति नभएसम्म छलफलमा नल्याइने बताएको अन्तर्राष्ट्रिय सञ्चारमाध्यमले जनाएका छन् ।

 

विश्वभरबाट अमेरिकी संसद्मा पठाइएको इमेल, फोन र लाखौँ वेबसाइटहरूको विरोधपछि यो २ विधेयकमाथिको राजनीतिक समर्थन घटेको थियो । गुगलको माध्यमबाट करिब ७० लाख मानिसले ज्ञापनपत्रमा हस्ताक्षर गरेका थिए । पिपा विधेयकका करिब ४० प्रस्तावक रहेकामा सर्वत्र विरोध सुरु भएपछि अधिकांश सांसदले समर्थन फिर्ता लिएका थिए ।